Чести бактериски инфекции кај деца

Антибиотиците се употребуваат за третман на бактериски инфекции, а кај вирусните инфекции не делуваат. Со оглед на тоа дека во светот се повеќе расте отпорноста на бактериите на антибиотици, бактериските инфекции треба со сигурност да се дијагностицираат и лекуваат.¹

Кои се најчести бактериски инфекции кај деца?

Воспаление на средно уво

До третата година од животот околу три четвртини од децата и нивните родители најмалку еднаш се сретнуваат со воспаление на средно уво.² Тоа често следи по инфекција на горнореспираторниот систем поради лошата проодност на носот и Еустахиевата туба. Најчести симптоми на оваа состојба се болка во увото, покачена телесна температура и останатите симптоми карактеристични за воспаление на горнореспираторениот систем.

Иако кај воспалението на средно уво во дури 80% од случаите е присутна бактериска инфекција, не се препорачува веднаш лечење со антибиотици, туку најпрво се следи состојбата на детето 2 до 3 дена.

Кога антибиотикот е правилен избор?

Ако состојбата не се подобри или е уште полоша до следната посета на лекар; кога ќе се потврди дијагноза на бактериска инфекција; кај потежок облик на болест; при јака болка во увото и телесна температура над 39 °C. Во секој случај, се употребуваат антибиотици кај доенчиња помали од 6 месеци. Дури 4 од вкупно 5 случаи на воспалено средно уво се лечат сами во период од 7 до 14 дена.²

Ангина

Поимот ангина го употребуваме за воспаление на грлото и крајниците. Најчест причинител на таканаречената гнојна ангина е бактеријата бета-хемолитички стрептокок од групата А. Вообичаено се јавува помеѓу 5. и 15. годишна возраст и е релативно поретка кај децата од предучилишна возраст.

Симптомите се јавуваат изненадно и се манифестираат како болно грло, тешкотии при голтање, покачена телесна температура, отечени крајници и грло. Дијагнозата на бактериска инфекција лекарот ја потврдува преку брис од грло, а потоа воведува лекување со антибиотик. Овој тип на бактерии исто така се причинители и на шарлах, кој има ист тек на болеста со ангината и единствена разлика е тоа што кај шарлахот брзо се јавува и кожен осип по телото. Затоа дијагностицирањето на шарлах е побрзо и што поскоро се почнува лекување со антибиотик.²

Воспаление на синуси

Синузитис или воспалението на синуси во 95% од случаите е предизвикан од вирусна инфекција позната како обична настинка. Кај скоро секое десетто дете на вирусната инфекција на горнореспираторниот систем, се накалемува и секундарна бактериска инфекција.

Бактерискиот синузитис најчесто го предизвикува истата бактерија како и кај инфекцијата на средното уво. Поради местоположбата лекарот не може да направи брис од инфицираниот синус и тешко му е да ги разликува вирусната од бактериската инфекција на синусите. Најдобар доказ дека станува збор за бактериска инфекција е времетраењето на симптомите. Затнат нос, кашлање и болка во грлото се симптоми кои кај бактериска инфекција траат повеќе од 10 дена и нема видливо подобрување.

Вирусните и бактериските инфекции често поминуваат и без употреба на антибиотик, но секако дека лекар по своја стручна проценка може да го препише.²

Во светот се повеќе расте отпорноста на бактериите на антибиотици. Затоа нивната употреба треба да биде рационална и пред се оправдана. Секоја кашлица и течење на нос не значи дека на Вашето дете му е потребен антибиотик бидејќи може да му направи повеќе штета отколку корист. На вируси, причинители на настинка, навистина не делуваат, а може да предизвикаат пролив, што според некои податоци може да се јави кај скоро секое петто дете.²

Повеќе за правилната употреба на антибиотици прочитајте во текстот.