Грчеви кај доенчиња

Неутешниот плач кај доенчињата најчесто се јавува доцна попладне или навечер и трае:

• најмалку три часа дневно
• најмалку три дена неделно и
• најмалку три последователни седмици

Додека плаче, бебето бара да цица или пак бара цуцла, а кога ќе му биде понудено, веднаш одбива. Грчевите често се проследени со гасови и отежнато празнење на цревата..

Причини за појава на грчеви или колики кај новороденчиња

Иако не е констатиран точниот причинител за појавата на грчеви, постојат бројни објаснувања, меѓу кои:

• недоволно развиен гастроинтестинален систем кај доенчињата
• забрзана работа на цревата кај доенчињата (перисталтика)
• за време на хранењето доенчињата голтаат премногу воздух (кој во цревата предизвикува надуеност и појава на грчеви; тегобите се почести кај доенчињата кои се хранат со цуцла со поголем отвор)
• алергија или преосетливост кај доенчињата на некоја состојка од храната (храна богата со јаглехидрати) или на состојка од храната која ја конзумирала мајката (протеини од кравјо млеко, јајца); поголемиот број алергии се минливи и можат да се спречат со диетална исхрана
• лактозна интолеранција (недостаток на ензимот лактаза кој во цревата помага во разградување на лактозата)
• коликите исто така можат да бидат знак за сериозно заболување, па најдобро е доенчето да го прегледа педијатар

Повеќето здрави новороденчиња ги добиваат сите потребни хранливи состојки преку мајчиното млеко или со употребата на млечни формули. Па оттаму, поради грчевите не се престанува со доење, а доколку детето се храни со млечна формула, треба да се обидеме да ја замениме. Млечната формула со ознаката AC, има прилагоден состав за деца со грчеви.

Често е погрешно верувањето дека мајката која што дои новороденче кое има грчеви треба да биде на диета. Тоа не е потребно, освен доколку кај новороденчето е потврдена алергија на кравјо млеко или јајца. Поради непотребната диета на мајката ќе ѝ бидат скратени важни хранливи состојки и енергија, која и е повеќе од потребна, а на новороденчето нема ни малку да му помогне.

Како можете да му помогнете на своето бебе кога има грчеви?

1. Земете го бебето во прегратка и нежно лулајте го или така движете се низ домот.
2. Завиткајте го бебето во ќебенце да би се чувствувало удобно, па така лулајте го во количка или во неговото креветче.
3. Можете исто така да го ставите бебето во носилка која е добро прицврстена на своите гради. Бебињата сакаат да го почувствуваат мајчиното срцебиење, ги смирува.
4. Некои бебиња се смируваат возејќи се во автомобил.
5. Нежно масирајте го стомачето на бебето со топло бебешко масло.
6. Ставете на бебешкото стомаче загреана пелена и нежно масирајте. Можете да користите и бебешки термофори против грчеви кои се исто така практични.
7. Педијатрите препорачуваат капки кои содржат пробиотик ( млечно-киселинска бактерија) Lactobacillus rhamnosus GG, и тоа оние кај кои бактериите се најдобро заштитени односно микроинкапсулирани.
8. Тивкото пеење исто така може да го смири бебето.
9. Проверете ја својата исхрана ако доите бебе. Исфрлете ја храната која предизвикува гасови (грашок, грав, зелка), намалете го внесот на газирани пијалоци, кафе, чоколада, бибер, лути пиперки, чили и други јаки зачини.
10. Оставете го бебето на кратко во неговото креветче со тивка и смирувачка музика ( Mozart, Beethoven), после неколку минути самото ќе се смири.

Родители, пред сè бидете трпеливи и смирени. Погрижете се да го запазите редот при хранење на детето и погрижете се при јадење детето да не голта премногу воздух; се препорачува масажа на стомачето, а освен тоа можете да употребите билни капки или капки со пробиотик со витамин Д или без него.